Kif issib u titħarreġ għal impjiegi li hemm domanda għalihom

Hekk kif il-ħaddiema akbar fl-età waslu biex jirtiraw, hemm ħafna opportunitajiet għal dawk il-persuni li qegħdin ifittxu impjieg li jikkunsidraw li jieħdu taħriġ għal rwoli li hemm domanda għalihom.

Il-Kummissjoni Ewropea identifikat 42 okkupazzjoni b’nuqqas ta’ ħaddiema, f’oqsma li jvarjaw mill-kura tas-saħħa u l-ospitalità sal-industriji diġitali u ekoloġiċi ġodda emerġenti. Billi jtejbu l-ħiliet tagħhom biex ikunu jistgħu jkopruhom, il-persuni li qegħdin ifittxu impjieg jistgħu jsibu r-rwol il-ġdid li huwa tajjeb għalihom. Hawnhekk nidentifikaw xi wħud mill-industriji fejn huwa probabbli li jkun hemm domanda għall-kandidati minn madwar l-UE – u l-appoġġ li jistgħu jużaw biex jiksbuhom.

Trasport

Is-sewqan ta’ trakk jista’ jkun rwol pjaċevoli u vitali – u huwa qasam fejn il-persuni li qegħdin ifittxu impjieg issa jistgħu jsibu opportunitajiet ta’ xogħol u jibbenefikaw minn salarji li qegħdin jiżdiedu. It-trasport ta’ merkanzija madwar l-Ewropa huwa kruċjali għall-ktajjen tal-provvista madwar il-kontinent. Tliet snin ilu, FreightConnections, minn DHL Freight, iċċitat data tal-industrija li tissuġġerixxi li fl-2022 kien hemm diġà nuqqas ta’ 400 000 sewwieq ta’ trakkijiet tqal fl-Ewropa. Din qalet li s-sitwazzjoni x’aktarx marret għall-agħar hekk kif is-sewwieqa – li dak iż-żmien kellhom età medja ta’ aktar minn 50 sena – kienu waslu biex jirtiraw, f’industrija li sabitha diffiċli li tirrekluta f’dawn l-aħħar snin. Is-sena l-oħra, rapport mill-Unjoni Internazzjonali tat-Trasport bit-Triq (IRU) qal li n-nuqqas ta’ sewwieqa jfisser li nofs l-operaturi Ewropej tat-trakkijiet ma setgħux jespandu.

Iżda n-nuqqasijiet issa qegħdin jirriżultaw f’żieda fis-salarji u f’ċansijiet qawwija li jinstab xogħol. Ir-rapport tal-2024 tal-IRU sab li s-salarju medju Ewropew tas-sewwieqa tat-trakkijiet kien 55 % iżjed mill-paga minima nazzjonali, b’dan jilħaq sa 133 % fin-Netherlands.

Il-pajjiżi tal-UE qegħdin jieħdu varjetà ta’ approċċi biex jinkoraġġixxu lill-persuni li qegħdin ifittxu impjieg biex jitħarrġu fit-trasport. Fid-Danimarka, pereżempju, ġie stabbilit fond ta’ responsabbiltà soċjali li joffri appoġġ – inklużi simulaturi – lit-trainees li jkunu qegħdin jitgħallmu jsuqu t-trakkijiet. Fl-Italja, hemm miżuri reġjonali u nazzjonali fis-seħħ biex jirrimborżaw 80 % tal-ispiża tat-taħriġ u l-kwalifiki tas-sewwieqa.

Il-kura tas-saħħa

Hemm ħtieġa kbira u dejjem tikber ta’ ħaddiema fil-qasam tal-kura tas-saħħa – rwol essenzjali u ta’ kura li se jsir saħansitra aktar importanti f’soċjetà li qed tixjieħ. Ix-xogħlijiet fil-qasam tal-kura tas-saħħa, minn tobba ġenerali u speċjalisti sa infermiera u assistenti tal-kura tas-saħħa, huma inklużi fil-lista tal-Kummissjoni Ewropea ta’ okkupazzjonijiet nieqsa mill-ħaddiema fl-UE kollha. Fis-snin li ġejjin, se jkun hemm aktar persuni anzjani li jkollhom bżonn il-kura, filwaqt li ħafna minn dawk li diġà jaħdmu fl-industrija waslu biex jirtiraw.

Fil-Latvja, fejn kien hemm nuqqasijiet ta’ tobba f’żoni rurali, ġie offrut appoġġ addizzjonali lill-prattikanti mediċi ġenerali reġjonali. Fl-Iżvezja, il-gvern dan l-aħħar investa biex jagħti spinta lill-kapaċità tas-servizzi tas-saħħa tiegħu.

Impjiegi diġitali u ekoloġiċi

It-tranżizzjonijiet tal-UE lejn it-teknoloġiji diġitali u ekoloġiċi qegħdin jippermettu lill-kontinent jaħseb għall-futur. Dan ifisser li se jkun hemm domanda qawwija għall-ħaddiema biex jitħarrġu f’dawn l-oqsma. L-ambizzjoni tal-Ewropa hija li ssir l-ewwel kontinent newtrali għall-klima, kif stabbilit fil-Patt Ekoloġiku Ewropew.  B’riżultat ta’ dan, x’aktarx li jkun hemm rwoli ġodda f’oqsma li jvaraw mill-kostruzzjoni u l-arkitettura sal-enerġija u l-inġinerija.

Barra minn hekk, id-domanda għall-ħaddiema diġitali x’aktarx li tikber. Ir-rapport 2023 Skills in Transition: the way to 2035 (Ħiliet fi Tranżizzjoni għall-2023; it-triq lejn l-2035) jissuġġerixxi li sal-2035 se jkun hemm domanda qawwija għall-professjonisti fil-qasam tal-ICT. Il-ħiliet diġitali huma prijorità ewlenija għall-UE. Aktar minn 70 % tan-negozji Ewropej qalu li n-nuqqas ta’ persunal ikkwalifikat b’mod diġitali qed iżomm lura l-investiment. F’Marzu, il-Kummissjoni Ewropea allokat EUR 1.3 biljun għall-ħiliet diġitali u t-teknoloġiji kritiċi, inkluża l-IA.

Kif jista’ jgħin l-EURES

In-network ta’ konsulenti tal-EURES minn madwar l-Ewropa jista’ joffri għajnuna u pariri lill-persuni li qegħdin ifittxu impjieg huma u jkunu qegħdin ifittxu biex isibu xogħol f’industriji li hemm domanda għalihom. Il-Konsulenti tal-EURES jistgħu jidentifikaw skemi ta’ taħriġ, joffru pariri dwar fejn hemm domanda għall-ħiliet tal-persuni li qegħdin ifittxu impjieg u jappoġġaw lill-kandidati biex jikkwalifikaw, jitgħallmu lingwi ġodda u japplikaw għall-impjiegi.

Ikklikkja hawn biex tistaqsi lil Konsulent tal-EURES dwar it-titjib tal-ħiliet għal impjiegi li hemm domanda għalihom.

Links relatati:

Tkellem ma’ Konsulent tal-EURES

Uża l-portal tal-EURES biex tiskopri liema impjiegi hemm domanda għalihom, u fejn

Kundizzjonijiet tal-ħajja u x-xogħol f’pajjiżi oħra tal-UE

Aqra aktar:

Il-Jiem Ewropej tal-Impjiegi

Sib Konsulenti tal-EURES

Kundizzjonijiet tal-ħajja u x-xogħol fil-pajjiżi tal-EURES

Bażi tad-Data tal-Impjiegi tal-EURES

Is-servizzi tal-EURES għall-impjegaturi

Il-Kalendarju tal-Avvenimenti tal-EURES

Avvenimenti Online li ġejjin

L-EURES fuq Facebook

L-EURES fuq X

L-EURES fuq LinkedIn

L-EURES fuq Instagram