Éire chun na Gearmáine – agus ar ais: tá sé beartaithe ag forbróir cluichí stiúideo a bhunú in Éirinn i ndiaidh gairm bheatha a bhaint amach thar lear

Deich mbliana ó shin, d’aistrigh Darren Kelly ó Éirinn chun na Gearmáine sa tóir ar ghairm i bhforbairt cluichí, le tacaíocht ó EURES. Sa lá atá inniu ann, is príomhfhorbróir é agus tá taithí 10 mbliana aige ar a bheith ag obair i stiúideonna i mBeirlín agus in München. Tá sé beartaithe ag Darren filleadh ar Éirinn agus a ghnó féin a thosú – agus chuaigh sé i dteagmháil chun buíochas a ghabháil le EURES as tacú leis nuair a bhí sé ag tús a aistir.

‘Ba mhaith liom buíochas ó chroí a ghabháil le EURES as cabhrú liom ról a aimsiú dom féin i dtionscal na gcluichí,’ a deir Darren. ‘Is tionscal é a bhfuil sé thar a bheith deacair ról a aimsiú ann mura bhfuil taithí agat. Níl a fhios agam céard a bheadh i ndiaidh tarlú dom mura mbeadh lámh chuidithe faighte agam ag tús m’aistir.’

Ó Éirinn chun na Gearmáine

Rinne Darren, atá 31 bliain d’aois, de bhunadh Chlaonta i gCo. Chill Dara, teagmháil le EURES den chéad uair in 2015 nuair a bhí sé díreach tar éis céim a bhaint amach in Ollscoil Teicneolaíochta an Oirdheiscirt, BSc i bhForbairt Cluichí Ríomhaire, agus bhí sé sa tóir ar a chéad post i dtionscal na gcluichí. Nuair nach raibh Darren in ann an post a bhí á lorg aige in Éirinn a aimsiú, thosaigh sé ag breathnú thar lear – agus ghlac sé páirt i scéim EURES a bhí dírithe ar bheochan agus ar fhorbairt cluichí. Chabhraigh an scéim sin leis chun a chéad phost a aimsiú i dtionscal na gcluichí – i mBeirlín.

An tráth sin, bhí comhar bunaithe ag EURES na hÉireann le roinnt cuideachtaí Eorpacha i dtionscal na gcluichí agus sa tionscal beochana a bhí ag tairiscint socrúchán do chéimithe. Faoin tionscadal, chlúdaigh EURES na hÉireann cuid de na costais athshocraithe. Bhí Darren ar dhuine de na rannpháirtithe Éireannacha ar tairgeadh socrúchán dóibh sa Ghearmáin.

‘Chabhraigh sé sin liom chun ról a bhaint amach dom féin sa tionscal,’ arsa Darren. Cé go raibh sé beartaithe aige cúrsa teanga a dhéanamh le tacaíocht EURES sular d’aistrigh sé chun na Gearmáine, theastaigh ón gcuideachta a thairg post dó go gcuirfeadh sé tús lena chuid oibre chomh luath agus ab fhéidir. Cé go raibh sé in ann Béarla a labhairt san áit oibre, trí chúrsaí a dhéanamh sa Ghearmáin chun an teanga a fhoghlaim d’éirigh leis a ghnó laethúil a dhéanamh ar bhealach níos éasca.

Den chéad 2.5 bliain, bhí Darren ina chónaí agus ag obair i mBeirlín. Ina dhiaidh sin, bhog sé go München, an Bhaváir, agus sa lá atá inniu ann oibríonn sé ó chian óna áit chónaithe in Augsburg. Le deich mbliana anuas, d’éirigh leis dul chun cinn a dhéanamh ina ghairm agus anois is príomhfhorbróir é, a bhfuil tacar sainscileanna teicniúla láidir aige mar aon le neart taithí.

‘Bhain mé an-tairbhe as an taithí,’ a dúirt Darren. ‘Mholfainn go mór é. D’athraigh sé mé mar dhuine, agus is duine níos fearr mé anois. D’fhás mé ar bhealaí nach mbeadh indéanta dá mbeinn i ndiaidh tar éis fanacht sa bhaile in Éirinn, chomh fada is a bhaineann le mo neamhspleáchas, mo ghairm agus mo shaol pearsanta.’

Pleananna don todhchaí

Tá sé beartaithe ag Darren anois filleadh ar Éirinn – tír atá ag infheistiú faoi láthair ina hearnáil cluichí digiteacha atá ag dul i méid trí bhearta éagsúla, lena n-áirítear creidmheasanna cánach. Tá sé mar aidhm aige stiúideo cluichíochta nuathionscanta a oscailt. ‘Ba mhaith liom tosú ag scála beag,’ a deir sé, ‘teicneolaíocht iontach uirlisí agus cluichí a fhorbairt a bheidh mé in ann a dhíol fad is atá ár gcluichí féin á bhforbairt agam.’

Bhí an méid seo a leanas le rá aige freisin: ‘Níl a leithéid de rud ann agus am maith chun cuideachta a thosú, ach ag pointe éigin caithfidh tú dul sa seans! Tosóidh mé ag scála beag, agus déanfaidh mé iarracht sruthanna ioncaim a fhorbairt trí uirlisí a úsáid a bhí á bhforbairt agam sula léimfidh mé isteach go hiomlán san aisling uaillmhianach seo.

‘Creidim gur mhúin mo thacar sainscileanna agus mo thaithí uathúil i rith mo ghairme go leor dom faoi conas cluichí a chruthú agus oibriú ar scála, agus faoi na huirlisí a theastaíonn chun a leithéid a dhéanamh. Tá léargas agam freisin ar conas uirlisí a chruthú don inneall cluiche Unity ionas gur féidir le mo chuideachta barr feabhais a chur ar an bpróiseas forbartha agus dlús a chur leis le himeacht ama.’

Conas is féidir le EURES cabhrú

Is féidir le cuardaitheoirí poist Eorpacha cosúil le Darren tairbhe a bhaint as Scéim Soghluaisteachta Spriocdhírithe EURES  anois. Faoin scéim seo, is féidir le saoránaigh AE a athshocraíonn chun oibre i dtír AE eile tacaíocht airgeadais a fháil chun na costais taistil d’agallaimh, d’athshocrú, d’oiliúint teanga agus d’aitheantas dá gcáilíochtaí a chlúdach.

Deir Kamila Weglicka de Carvalho, ó Oifig Comhordúcháin EURES na hÉireann: ‘Is céim mhór chun cinn é bogadh go tír nua chun tús a chur le post nua agus le stíl mhaireachtála nua. Is féidir le EURES an cinneadh sin a dhéanamh beagán níos éasca trí chuidiú le daoine post a fháil sula bhfágann siad an tír agus trí thacaíocht airgeadais a thairiscint chun cabhrú leis na costais athshocraithe.’

Cliceáil chun tuilleadh a léamh faoi straitéis na hÉireann maidir le fás san earnáil cluichíochta dhigiteach.

Naisc ghaolmhara:

Ag maireachtáil agus ag obair sa Ghearmáin 

Ag maireachtáil agus ag obair in Éirinn

Straitéis fáis earnáil cluichíochta dhigiteach na hÉireann

Léigh tuilleadh:

Laethanta Fostaíochta Eorpacha

Aimsigh Comhairleoirí EURES

Dálaí maireachtála agus oibre i dtíortha EURES

Bunachar Sonraí Post EURES

Seirbhísí EURES le haghaidh fostóirí

Féilire Imeachtaí EURES

Imeachtaí ar líne a bheidh ar siúl go luath

EURES ar Facebook

EURES ar X

EURES ar LinkedIn

EURES ar Instagram